ໂລກຍັງບໍ່ໃກ້ຈຸດສິ້ນສຸດໂຄວິດແຕ່ກໍາລັງເລີ່ມຕົ້ນ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ນັກລະບາດວິທະຍາລະດັບໂລກ ໜຶ່ງໃນທີມງານຂອງອົງການກະນາໄມໂລກ (WHO) ໄດ້ເປີດເຜີຍວ່າ: ການແຜ່ລະບາດຂອງພະຍາດໂຄວິດ-19 ຈະຍັງບໍ່ທັນສິ້ນສຸດລົງໃນໄວໆນີ້ ເພາະມີປະຊາຊົນສ່ວນໜ້ອຍໃນໂລກໄດ້ສັກວັກຊິນປ້ອງກັນໂຄວິ ດ, ສິ່ງທີ່ເກີດຂຶ້ນເປັນພຽງຈຸດເລີ່ມຕົ້ນ

ທ່ານ ດຣ.ແລຣີ ບຣິນລຽນ ນັກລະບາດວິທະຍາທີ່ມີຊື່ສຽງລະດັບໂລກ ໜຶ່ງໃນຄະນະເຮັດວຽກຂອງ WHO ກ່າວວ່າ ພະຍາດໂຄວິດ-19 ສາຍພັນເດວຕ້າເຮັດໃຫ້ເກີດພະຍາດລະບາດຫຼາຍທີ່ສຸດເທົ່າທີ່ເຄີຍມີມາ ໃນໄລຍະຫຼາຍເດືອນທີ່ຜ່ານມາ ອາເມຣິກາ, ອິນເດຍ, ຈີນ, ປະເທດຕ່າງໆໃນເອີຣົບ, ອາຟຣິກາ ແລະ ອາຊີ ຕ່າງກໍຕ້ອງຕໍ່ສູ້ກັບສາຍພັນເດວຕ້າທີ່ແຜ່ກະຈາຍເຊື້ອໄດ້ສູງ.ທ່ານ ດຣ.ບຣິນລຽນ ກ່າວວ່າ ຂ່າວດີກໍຄື ວັກຊິນທີ່ເປັນເຕັກໂນໂລຊີ mRNA ແລະ ວັກຊິນຈອນສັນແອນຈອນສັນ ກຳລັງພັດທະນາປະສິດທິພາບຕ້ານເຊື້ອພະຍາດໂຄວິດ-19 ສາຍພັນເດວຕ້າ ຊຶ່ງທ່ານ ດຣ.ບຣິນລຽນ ລະບຸວ່າ ຂະນະນີ້, ມີພຽງ 15% ຂອງປະຊາກອນໂລກທີ່ໄດ້ຮັບການສັກວັກຊິນປ້ອງກັນພະຍາດໂຄວິດ-19 ແລະ ມີຫຼາຍກວ່າ 100 ປະເທດທີ່ສັກວັກຊິນໜ້ອຍກວ່າ 5% ຂອງປະຊາກອນພາຍໃນປະເທດ ໂດຍທ່ານຊີ້ໃຫ້ເຫັນວ່າ ນີ້ຄືຈຸດເລີ່ມຕົ້ນການແຜ່ລະບາດຂອງໄວຣັສຫຼາຍກວ່າຈຸດສິ້ນສຸດ ແລະ ກຳລັງສັງເກດການວ່າ ການແຜ່ລະບາດຂອງສາຍພັນເດວຕ້າທີ່ມີຢູ່ຂະນະນີ້ ຈະຢູ່ດົນປານໃດ ເວັ້ນແຕ່ວ່າ ຈະສາມາດສັກວັກຊິນໃຫ້ແກ່ປະຊາຊົນທຸກຄົນໃນ 200 ປະເທດຂຶ້ນໄປ ເຖິງແມ່ນວ່າຈະຍັງມີສາຍພັນເກີດໃໝ່.

ທ່ານ ດຣ.ບຣິນລຽນ ໄດ້ຄາດຄະເນການແຜ່ລະບາດຂອງພະຍາດໂຄວິ ດ ໃນຊານຟານຊິສໂກ ແລະ ນິວຢອກ ເປັນລັກສະນະເສັ້ນໂຄ້ງຮູບໂຕວີກັບຫົວ, ນັ້ນສະແດງວ່າ ການຕິດເຊື້ອພະຍາດໂຄວິດ-19 ເພີ່ມຂຶ້ນຢ່າງວ່ອງໄວ ແຕ່ກໍຈະຫຼຸດລົງຢ່າງວ່ອງໄວເຊັ່ນດຽວກັນ ຖ້າຫາກການຄາດຄະເນນີ້ເປັນຄວາມຈິງ ໝາຍຄວາມວ່າ ສາຍພັນເດວຕ້າແຜ່ກະຈາຍຢ່າງວ່ອງໄວຢ່າງທີ່ເກີດຂຶ້ນໃນອັງກິດ ແລະ ອິນເດຍ ຊຶ່ງການແຜ່ລະບາດຂອງສາຍພັນເດວຕ້າຫຼຸດຕ່ຳລົງຈາກທີ່ເຄີຍຂຶ້ນສູງສຸດມາແລ້ວ.

ໂດຍເວບໄຊຂໍ້ມູນຂອງໂລກເຮົາ (Our World in Data) ລະບຸວ່າ ຈຳນວນຜູ້ຕິດເຊື້ອພະຍາດໂຄວິດ-19 ໃນອັງກິດສະເລ່ຍໃນໄລຍະ 7 ວັນທີ່ຜ່ານມາ ຫຼຸດລົງຈາກຈຸດສູງສຸດທີ່ຢູ່ປະມານ 47.700 ຄົນໃນວັນທີ 21 ກໍລະກົດ ເຫຼືອຢູ່ທີ່ 26.000 ຄົນໃນວັນທີ 5 ສິງຫາ. ສ່ວນອິນເດຍ ພົບຜູ້ຕິດເຊື້ອໂຄວິດ-19 ລາຍວັນຕ່ຳກວ່າ 50.000 ຄົນຕັ້ງແຕ່ທ້າຍເດືອນມິຖຸນາຈາກທີ່ເຄີຍຕິດເຊື້ອລາຍວັນສູງສຸດເຖິງ 390.000 ຄົນໃນເດືອນພຶດສະພາທີ່ຜ່ານມາ.

Related Posts

Leave a Reply

Your email address will not be published.