ສົມວັນຈະເລີນ ເປໂຕລຽມ ພ້ອມສະໜອງນ້ຳມັນ ແລະ ເປີດບໍລິການປໍ້ານໍ້າມັນ ຢູ່ 11 ແຂວງ

ສົມວັນຈະເລີນ ເປໂຕລຽມ ພ້ອມສະໜອງນ້ຳມັນ ແລະ ເປີດບໍລິການປໍ້ານໍ້າມັນ ຢູ່ 11 ແຂວງ

ບໍລິສັດ ສົມວັນຈະເລີນ ເປໂຕລຽມ ເຈວລີ ຈຳກັດ(SVP) ເປັນບໍລິສັດໜຶ່ງທີ່ໄດ້ຮັບອະນຸ ຍາດໃຫ້ເຄື່ອນໄຫວທຸລະກິດ ດ້ານການນໍາເຂົ້າ ແລະ ສົ່ງອອກ ນ້ຳມັນເຊື້ອໄຟ ທີ່ຖືກຕ້ອງຕາມລະບຽບ ແລະ ກົດໝາຍ ທີ່ພັກ, ລັດຖະບານ ວາງອອກ ເຊິ່ງມີສຳນັກງານຕັ້ງຢູ່ບ້ານນາທວນ ເມືອງຮຽ້ມ ແຂວງຫົວພັນ; ປັດຈຸບັນ, ແມ່ນມີຄວາມພ້ອມທີ່ຈະສະໜອງນໍ້າມັນໃຫ້ແກ່ຜູ້ຊົມໃຊ້ໃຫ້ພຽງພໍ ກັບຄວາມຮຽກຮ້ອງຕ້ອງການຂອງສັງຄົມ.

ພ້ອມນັ້ນ, ບໍລິສັດ ສົມວັນຈະເລີນ ຍັງໄດ້ເປີດໃຫ້ບໍລິການປໍ້ານໍ້າມັນ ຢູ່ 11 ແຂວງພາກເໜືອ ແລະ ພາກກາງ ຂອງ ສປປ ລາວ ເຊິ່ງມີທັງໝົດ 174 ປໍ້າ, ຄາດວ່າພາຍໃນເດືອນກໍ ລະກົດ 2022 ນີ້ ຈະນຳເຂົ້ານ້ຳມັນເຊື້ອໄຟ ໃຫ້ໄດ້ທັງໝົດ 15-20 ລ້ານລິດ.

ທ່ານ ສັນຕິ ສີດາວົງ ຮອງອຳນວຍການ ບໍລິສັດ ສົມວັນຈະເລີນ ເປໂຕລຽມ ເຈວລີ ຈຳກັດ ທັງເປັນເຈົ້າຂອງປໍ້າມັນນໍ້າ ສັນຕິ ບໍລິການ ສາຂານາຄູນ, ສາຂາພະຂາວ, ສາຂາໜອງວຽງຄຳ ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວ ໃນວັນທີ 25 ມິຖຸນາ 2022 ນີ້ວ່າ: ບໍລິສັດ ຕົນເປັນບໍລິສັດຂອງຄົນລາວ 100%, ສ້າງຕັ້ງຂຶ້ນໃນວັນທີ 24 ທັນວາ 2013 ແລະ ໄດ້ເລີ່ມເຄື່ອນໄຫວຕົວຈິງ ນຳເຂົ້ານໍ້າມັນເຊື້ອໄຟ ໃນທ້າຍທ້າຍປີ 2017 ເປັນຕົ້ນມາ.

ປັດຈຸບັນ ມີລົດຂົ່ນສົ່ງນ້ຳມັນເຊື້ອໄຟທັງໝົດ 60 ກວ່າຄັນ ພ້ອມທັງເປີດໃຫ້ບໍລິການ ປໍ້ານໍ້າມັນ ຢູ່ 11 ແຂວງ, 174 ປໍ້າ ຄື: ແຂວງຫົວພັນ 40 ປໍ້າ, ແຂວງຊຽງຂວາງ 16 ປໍ້າ, ແຂວງຫລວງພະບາງ 13 ປໍ້າ, ແຂວງອຸດົມໄຊ 3 ປໍ້າ, ແຂງຫລວງນ້ຳທາ 13 ປໍ້າ, ແຂວງບໍ່ແກ້ວ 40 ປໍ້າ, ໄຊຍະບູລີ 15 ປໍ້າ, ແຂວງວຽງຈັນ 14 ປໍ້າ, ນະຄອນຫລວງວຽງຈັນ 10ປໍ້າ; ແຂວງໄຊສົມບູນ 6 ປໍ້າ ແລະ ແຂວງບໍລິຄຳໄຊ 4 ປໍ້າ.

ທ່ານສັນຕິ ສີດາວົງ ກ່າວອີກວ່າ: ເຖິງວ່າ ບໍລິສັດຕົນ ບໍ່ນອນໃນ 4 ບໍລິສັດ ທີ່ລັດຖະບານໃຫ້ບູມາສິດແລກເງິນຕາຕ່າງປະເທດກໍ່ຕາມ ພວກເຮົາກໍຈະພະຍາຍາມປະຄັບປະຄອງ ແລະ ເຈລະຈາກັບຜູ້ສະໜອງຫລາຍໆຮູບແບບ ເຊັ່ນວ່າ: ຊອກຫາແຫລ່ງເງິນຕາຈາກຫລາຍແຫລ່ງ, ເຈລະຈາກັບຜູ້ສະໜອງເລື່ອນການຊຳລະຈາກພາຍໃນມື້ ເປັນ 25-30 ວັນ ຫລັງຈາກທີສັ່ງຊື້ນ້ຳມັນ;

ນອກນັ້ນ, ພວກເຮົາຍັງມີນ້ຳມັນທີຈອງໄວ້ລ່ວງໜ້າຈຳນວນໜຶ່ງ, ປັດຈຸບັນກໍຄືໃນໄລຍະນີ້ ແມ່ນສາມາດເປີດໃຫ້ບໍລິການໄດ້ພຽງ 60 ປໍ້າ ໃນຂອບເຂດທົ່ວປະເທດ ແຕ່ຈະຍາຍາມເປີດໃຫ້ບໍລິການສ່ວນທີຍັງເຫລືອໃຫ້ໄດ້ໂດຍໄວ.

ບໍລິສັດ ສົມວັນຈະເລີນ ເປໂຕລ້ຽມ ມີສາງບັນຈຸນໍ້າມັນເຊື້ອໄຟ 9 ແຫ່ງ, ສາມາດບັນຈຸນໍ້າມັນໄດ້ 10 ລ້ານກວ່າລິດ; ໃນນັ້ນ, ແອັດຊັງພິເສດ 5 ແສນລິດ, ແອັດຊັງທຳມະດາ 4 ລ້ານກວ່າລິດ, ກາຊວນ 7 ລ້ານກວ່າລິດ.

ນັບແຕ່ປີ 2017 ເປັນຕົ້ນມາ ຮອດປັດຈຸບັນ ສາມາດນໍາເຂົ້ານ້ຳມັນເຊື້ອໄຟ ໄດ້ທັງໝົດ 438 ລ້ານກວ່າລິດ ແລະ ສາມາດມອບພາສີອາກອນໃຫ້ລັດ ໄດ້ທັງໝົດ 1.500 ຕື້ກວ່າກີບ.

ທ່ານ ສັນຕິ ສີດາວົງ ໃຫ້ຮູ້ອີກວ່າ: ປ້ຳນ້ຳມັນ ທີ່ເປັນຕົວແທນຈຳໜ່າຍ ຂອງບໍລິສັດ ຢູ່ເຂດທົ່ວປະເທດ ເປີດໃຫ້ບໍລິການດ້ວຍຄວາມຄວາມວ່ອງໄວ, ບໍລິການດີ, ມີສິ່ງອຳນວຍຄວາມສະດວກຫລາຍຢ່າງ (ມີບໍລິການດື່ມນ້ຳຟຣີ) ໂດຍສະເພາະ ປໍ້ານໍ້າມັນສັນຕິ ບໍລິການ ເປີດໃຫ້ບໍລິການທຸກໆວັນ ເລີ່ມແຕ່ເວລາ 6:30-19:00 ໂມງ.

ໃນຊວງໄລຍະ ທີ່ນໍ້າມັນເຊື້ອໄຟຂາດຕະຫລາດໃນ ສປປ ລາວ, ບໍລິສັດ ໄດ້ແຮນໍ້າມັນເຊື້ອໄຟໄວ້ ເພື່ອສະໜອງໃຫ້ບັນດາລົດສຸກເສີນ, ລົດກູໄພ, ລົດດັບເພີງ, ລົດເຈົ້າໜ້າທີຕຳຫລວດ ລວມເຖິງລົດຮັບໃຊ້ບັນດາການນຳ, ພ້ອມທັງ ສະໜອງໃຫ້ຊາວກະສິກອນ ທີ່ນຳເອົາຕຸກມາໃສ່.

ພ້ອມດຽວກັນນັ້ນ, ທ່ານ ສັນຕິ ສີດາວົງ ຍັງໄດ້ຮຽກຮ້ອງໃຫ້ລັດຖະບານ ສະໜອງເງິນຕາຕ່າງປະເທດ ໃຫ້ກັບບັນດາ ບໍລິສັດ ນຳເຂົ້ານ້ຳມັນເຊື້ອໄຟ ທີ່ມີຢູ່ໃນຂອບເຂດທົ່ວປະເທດ ໃຫ້ເທົ່າທຽມກັນ ເພື່ອສ້າງເງື່ອນໄຂ ອຳນວຍຄວາມສະດວກ ໃນການນຳເຂົ້ານ້ຳມັນ ເພື່ອສະໜອງຢູ່ພາຍໃນປະເທດໃຫ້ທົ່ວເຖິງ ແລະ ພຽງພໍກັບຄວາມຮຽກຮ້ອງຕ້ອງການ ໃນຕໍ່ໜ້າ.

ຂ່າວ-ພາບ: ກິຕາ

Related Posts

Leave a Reply

Your email address will not be published.