ຂ່າວທົ່ວໄປ

ສະເໜີໃຫ້ເພີ່ມຂຶ້ນອີກເນື່ອງຈາກຄ່າຄອງຊີບນັບມື້ສູງຂຶ້ນ

ໃນໂອກາດປະກອບຄໍາເຫັນຕໍ່ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ໃນວັນທີ 9 ທັນວານີ້,

ທ່ານ ພອນສານ ວິໄລເມັ້ງ, ສະມາຊິກສະພາແຫ່ງຊາດຈາກເຂດເລືອກຕັ້ງທີ 13, ແຂວງສະຫວັນນະເຂດ ໄດ້ສະເໜີຫລາຍບັນຫາຕໍ່ລັດຖະບານເພື່ອປັບປຸງແກ້ໄຂໃຫ້ດີຂຶ້ນ. ໜຶ່ງໃນນັ້ນ ແມ່ນບັນຫາຄ່າແຮງງານຂັ້ນຕໍ່າ.

ທ່ານໄດ້ສະເໜີໃຫ້ເພີ່ມຂຶ້ນອີກເນື່ອງຈາກຄ່າຄອງຊີບນັບມື້ສູງຂຶ້ນ ເຊີ່ງໄລຍະຜ່ານມາສູນກາງສະຫະພັນກໍາມະບານລາວໄດ້ສະເໜີເພີ່ມຈາກ 1.100.000 ກີບ ເປັນ 1.500.000 ກີບ,

ຜ່ານການເຈລະຈາຕໍ່ລອງຂອງອົງການແຮງງານສາມຝ່າຍແມ່ນບໍ່ບັນລຸຕາມທີ່ສະເໜີ, ແຕ່ໄດ້ໃນລະດັບ 1.200.000 ກີບ ໃນປັດຈຸບັນນີ້ ແລະ ຈະເພີ່ມຂຶ້ນເປັນ 1.300.000 ກີບໃນເດືອນພຶດສະພາ ປີ 2023.

ດັ່ງນັ້ນ, ທ່ານໄດ້ສະເໜີໃຫ້ລັດຖະບານ ກໍຄື ສະພາການຄ້າ ແລະ ອຸດສາຫະກໍາແຫ່ງຊາດ ຄົ້ນຄວ້າເພື່ອກໍານົດຄ່າແຮງງານຂັ້ນຕໍ່າຂຶ້ນຕື່ມ

ເພື່ອແນໃສ່ຈູງໃຈແຮງງານລາວໃຫ້ສົນໃຈອອກແຮງງານຢູ່ລາວນັບມືຫລາຍຂຶ້ນ ແລະ ຫລຸດຜ່ອນການໄປອອກແຮງງານຢູ່ຕ່າງປະເທດ ເນື່ອງຈາກພາຍຫລັງການລະບາດຂອງພະຍາດໂຄວິດ-19 ມານີ້,

ມີແຮງງານລາວຫລັ່ງໄຫລໄປປອອກແຮງງານຢູ່ຕ່າງປະເທດນັບມື້ຫລາຍຂຶ້ນ ໂດຍສະເພາະບັນດາບ້ານຂອງເມືອງທີ່ຢູ່ລຽບຕາມຊາຍແດນກັບປະເທດໃກ້ຄຽງ ເຮັດໃຫ້ມີບາງບ້ານຍັງເຫລືອແຕ່ຜູ້ເຖົ້າ ແລະ ເດັກນ້ອຍ.

ນອກຈາກ, ທ່ານ ພອນສານ ວິໄລເມັ້ງ ຍັງມີສະມາຊິກສະພາແຫ່ງຊາດຫລາຍທ່ານຈາກຫລາຍເຂດເລືອກຕັ້ງ ກໍໄດ້ສະເໜີໃຫ້ລັດຖະບານປັບປຸງຄ່າແຮງງານຂັ້ນຕໍ່າຂຶ້ນອີກເຊັ່ນດຽວກັບ ເພື່ອແນໃສ່ເຮັດໃຫ້ແຮງງານຂັ້ນຕໍ່າສາມາດຢູ່ໄດ້ໃນສະພາບຄ່າຄອງຊີບທີ່ນັບມື້ສູງຂຶ້ນ.

ຕໍ່ຄໍາສະເໜີດັ່ງກ່າວນີ້, ທ່ານ ນາງ ໃບຄໍາ ຂັດທິຍະ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ຊີ້ແຈງວ່າ: ໃນການປັບຂຶ້ນຄ່າແຮງງານຂັ້ນຕໍ່າແຕ່ລະຄັ້ງ ແມ່ນຜ່ານການຄົ້ນຄວ້າພິຈາລະນາຈາກອົງການແຮງງານສາມຝ່າຍ ຄື:

ຕາງໜ້າລັດຖະບານ, ຕາງໜ້າຜູ້ອອກແຮງງານ ແລະ ຕາງໜ້າຜູ້ໃຊ້ແຮງງານ, ລວມເຖີງໄດ້ອີງໃສ່ລະບຽບການຂອງພາຍໃນ ແລະ ສາກົນກໍານົດໄວ້, ການຄົ້ນຄວ້າເພື່ອປັບຂຶ້ນຄ່າແຮງງານຂັ້ນຕໍ່າແຕ່ລະຄັ້ງແມ່ນໃຊ້ເວລາດົນ ແລະ ຕິດພັນກັບການເກັບກໍາຂໍ້ມູນຈາກທຸກພາກສ່ວນທີ່ກ່ຽວຂ້ອງ

ຈາກນັ້ນຈິ່ງປຶກສາຫາລືກັນໂດຍມີການດັດສົມຈາກລັດຖະບານ ໂດຍແມ່ນກະຊວງແຮງງານ ແລະ ສະຫວັດດີການສັງຄົມເປັນໃຈກາງຮ່ວມກັບບັນດາກະຊວງ ແລະ ຂະແໜງການທີ່ກ່ຽວຂ້ອງຈິ່ງສາມາດກໍານົດລາຄາຄ່າແຮງງານຂັ້ນຕໍ່າໄດ້.

ຢ່າງໃດກໍຕາມ, ທ່ານໄດ້ຢັ້ງຢືນວ່າ: ໃນເງື່ອນໄຂຄວາມເປັນຈິງ ການຈ່າຍຄ່າແຮງງານຂອງຫົວໜ່ວຍແຮງງານແມ່ນບໍ່ໄດ້ຈ່າຍຢູ່ໃນລະດັບ 1.200.000 ກີບ ຕາມທີ່ໄດ້ກໍານົດໃນປັດຈຸບັນ, ແຕ່ຈາກການສໍາຫລວດແລ້ວເຫັນວ່າສ່ວນຫລາຍຫົວໜ່ວຍແຮງງານຈ່າຍຄ່າແຮງງານໃນລະດັບຕໍ່າສຸດ 1.600.000 ກີບ.

ຂະນະດຽວກັນ ກະຊວງແຮງງານ ແລະ ສະຫວັດດີການສັງຄົມ ໄດ້ຊຸກຍູ້ໃຫ້ຫົວໜ່ວຍແຮງງານປັບປຸງຕົວເອງຄືນໃໝ່ເພື່ອດຶງດູດແຮງງານເຂົ້າສູ່ຕໍາແໜ່ງງານ ໂດຍສະເພາະການປັບປຸງດ້ານສະຫວັດດີການ ເປັນຕົ້ນ:

ການເຂົ້າລະບົບປະກັນສັງຄົມ, ທີ່ພັກ, ອາຫານ, ການເບິ່ງແຍງສຸຂະພາບ ແລະ ອື່ນໆ.

Related Articles

Leave a Reply

Your email address will not be published. Required fields are marked *

Back to top button