Breaking News

ສຸດເສົ້າ … ປີ 2020 ປີດຽວ ເນື້ອທີ່ປ່າໄມ້ຢູ່ລາວ ເສຍຫາຍຍ້ອນໄຟໄໝ້ລາມປ່າ 2 ແສນກວ່າເຮັກຕາ

ສຸດເສົ້າ … ປີ 2020 ປີດຽວ ເນື້ອທີ່ປ່າໄມ້ຢູ່ລາວ ເສຍຫາຍຍ້ອນໄຟໄໝ້ລາມປ່າ 2 ແສນກວ່າເຮັກຕາ ຫຼື ທຽບເທົ່າກັບ ສະໜາມກິລາ ເຈົ້າອານຸວົງ ປະມານ 115.000 ສະໜາມ !!!

ປີ 2020 ຜ່ານມາ, ເນື້ອທີ່ປ່າໄມ້ຢູ່ລາວເສຍຫາຍຍ້ອນໄຟໄໝ້ລາມປ່າ 209.682 ເຮັກຕາ, ໃນນີ້ ເກີດຂຶ້ນຫລາຍກວ່າໝູ່ແມ່ນຢູ່ ແຂວງອຸດົມໄຊ, ຫລວງນໍ້າທາ, ບໍ່ແກ້ວ, ຫລວງພະບາງ ແລະ ແຂວງໄຊຍະບູລີ.

ທ່ານ ຊູຊາດ ໄຊຍະກຸມມານ, ຫົວໜ້າກົມປ່າໄມ້, ກະຊວງກະສິກໍາ ແລະ ປ່າໄມ້ ໃຫ້ສໍາພາດວ່າ: ປີ 2020 ຜ່ານມາ ຖືເປັນປີທີ່ມີເນື້ອທີ່ປ່າໄມ້ຢູ່ລາວເສຍຫາຍຍ້ອນໄຟໄຫມ້ປ່າຫລາຍກວ່າໝູ່ໃນໄລຍະຜ່ານມາ ເຊີ່ງເກີດຂຶ້ນຈາກຫລາຍສາເຫດ ເປັນຕົ້ນ: ປະຊາຊົນຈຳນວນໜຶ່ງລະເມີດຖາງປ່າເຮັດໄຮ່, ຈູດໄຮ່, ຈູດຄັງລ້ຽງສັດ ແລະ ບຸກຄົນຈຳນວນໜຶ່ງເຂົ້າປ່າຫາກິນໄດ້ດັງໄຟແຕ່ບໍ່ດັບມອດຈິ່ງເຮັດໃຫ້ເກີດໄຟໄໝ້ລາມປ່າ. ນອກຈາກນີ້ ແມ່ນເກີດຈາກສະພາບອາກາດມີການປ່ຽນແປງເຮັດໃຫ້ເກີດໄພແຫ້ງແລ້ງ ແລະ ເກີດໄຟໄໝ້ລາມປ່າ.

ເພື່ອປ້ອງກັນ ແລະ ສະກັດກັ້ນໄຟຟໝ້ລາມປ່າໃນລະດູແລ້ງປີນີ້, ກົມປ່າ ໄມ້, ກະຊວງກະສິກຳ ແລະ ປ່າໄມ້ ໄດ້ອອກຄຳສັ່ງເລກທີ 2493/ກປ, ລົງວັນທີ 23 ທັນວາ 2020 ກ່ຽວກັບການເພີ່ມທະວີຄວາມຮັບຜິດຊອບ ສະກັດກັ້ນ, ຕ້ານໄຟໄໝ້ລາມປ່າ, ກະກຽມຜະລິດ, ເບ້ຍໄມ້, ປູກໄມ້ ແລະ ຟື້ນຟູປ່າປະ ຈຳປີ 2021 ເຖີງຂະແໜງການທີ່ກ່ຽວຂ້ອງໃນທົ່ວປະເທດ, ພ້ອມນີ້ ໄດ້ແຕ່ງ ຕັ້ງຄະນະຮັບຜິດຊອບເພື່ອ ລົງຊຸກຍູ້, ຕິດຕາມ ແລະ ສະກັດກັ້ນໄຟໄໝ້ລາມປ່າໃນຂອບເຂດທົ່ວປະເທດ ເພື່ອດຳເນີນ 2 ມາດຕະການ ຄື: ມາດຕະການປ້ອງກັນ ແລະ ສະກັດກັ້ນໄຟໄໝ້ລາມປ່າ ແລະ ມາດຕະການດັບມອດຫາກມີໄຟໄໝ້ລາມປ່າເກີດຂຶ້ນ. ຄະນະດັ່ງກ່າວປະກອບ ມີ 4 ຄະນະ ເຊີ່ງຄະນະທຳອິດຈະເຄື່ອນໄຫວຢູ່ 4 ແຂວງພາກເໜືອ ຄື: ແຂວງຜົ້ງສາລີ, ຫລວງນໍ້າທາ ແລະ ແຂວງບໍ່ແກ້ວ ກ່ອນປີໃໝ່ລາວປີນີ້. ຫລັງຈາກນັ້ນຄະ ນະທີ 2 ຈະເຄື່ອນໄຫວຢູ່ແຂວງອຸດົມໄຊ, ຫລວງພະບາງ, ຊຽງຂວາງ ແລະ ແຂວງຫລວງພັນ, ຄະນະທີ 3 ຈະເຄື່ອນໄຫວຢູ່ແຂວງໄຊຍະບູລີ, ວຽງຈັນ, ນະຄອນຫລວງວຽງຈັນ, ໄຊສົມບູນ ແລະ ແຂວງບໍລິຄຳໄຊ ແລະ ຄະນະສຸດ ທ້າຍຈະເຄື່ອນໄຫວຢູ່ແຂວງສະຫວັນນະເຂດ, ຈຳປາສັກ, ສາລະວັນ, ເຊກອງ ແລະ ແຂວງອັດຕະປື.

ຫົວໜ້າກົມປ່າໄມ້, ກະຊວງກະສິກໍາ ແລະ ປ່າໄມ້ ໃຫ້ຮູ້ຕື່ມວ່າ: ສະເພາະລະດູແລ້ງປີ 2021 ນີ້ ມີໄຟໄຫມ້ລາມປ່າເກີດຂຶ້ນຢູ່ບາງແຂວງພາກເໜີືອແລ້ວ ເປັນຕົ້ນ: ແຂວງອຸດົມໄຊ, ຜົ້ງສາລີ ແລະ ອື່ນໆ ແຕ່ບໍ່ຮ້າຍແຮງ ແລະ ຍັງບໍ່ທັນມີລາຍງານຜົນເສຍຫາຍເທື່ອ.ດັ່ງນັ້ນ ທ່ານໄດ້ຮຽກຮ້ອງມາຍັງປະ ຊາຊົນທຸກຄົນ ໂດຍສະເພາະຜູ້ທີ່ອາໃສຢູ່ເຂດທີ່ມີຄວາມສ່ຽງ ຈົ່ງຮ່ວມກັນປ້ອງກັນ ແລະ ສະກັດກັ້ນໄຟໄໝ້ລາມປ່າ, ການເຮັດໄຮ່, ເຮັດສວນ ແລະ ທຳມາຫາກິນ, ກ່ອນການຈູດຕ້ອງເຮັດແລວກັນໄຟອ້ອມຮອບເນື້ອທີ່ທີ່ຈະຈູດໃຫ້ຮັບປະກັນດີຈິ່ງຈູດ ເພື່ອບໍ່ໃຫ້ໄຟລາມໄປບ່ອນອື່ນ, ການຈູດຕ້ອງຈູດຍາມແລງ ຫລື ຍາມແດດອ່ອນ ແລະ ບໍ່ມີລົມແຮງ ແລະ ອື່ນໆ.

ຂ່າວ: ບຸນຕຽງ ຈັນທະວົງພາບ:

ບຸນຍັງ ພຸດສະຫວັດ

Lao National Radio

About admin

Check Also

ບໍລິສັດ ລາວ ໂທລະຄົມມະນາຄົມ ມະຫາຊົນ ຈັດພິທີ ມອບ-ຮັບ ກ່ອງປັນສຸກ ໃນກິດຈະກໍາ “ ລາວ ໂທລະຄົມ ປັນສຸກ ”

ໃນວັນທີ 8 ທັນວາ 2021 ຢູ່ທີ່ ສໍານັກງານໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ມີພິທີ ມອບ-ຮັບ ກ່ອງປັນສຸກ ໃນກິດຈະກໍາ CSR …

Leave a Reply

Your email address will not be published. Required fields are marked *

Recent Comments

No comments to show.