ປາຂ່າ ແມ່ນໍ້າຂອງທີ່ຍັງມີເຫຼືອຢູ່ໃນປະເທດລາວ ສ່ຽງຕໍ່ການສູນພັນ

ຈາກການໃຫ້ຂໍ້ມູນຂອງທີມງານລາດຕະເວນ ຫຼື ເຈົ້າໜ້າທີ່ຄຸ້ມຄອງວັງອະນຸລັກປາຂ່າ ໃນລະຫວ່າງ 1-2 ປີທີ່ຜ່ານມາ ສາມາດພົບເຫັນໄດ້ ປະມານ 3-4 ໂຕ ແລະ ຈໍານວນ 2 ໂຕທີ່ຕາຍໃນບໍ່ດົນມານີ້ ອາດນອນຢູ່ໃນຈໍານວນທີ່ທີມງານລາດຕະເວນພົບເຫັນ.

ອົງການກອງທຶນອະນຸຮັກທໍາມະຊາດໂລກ ປະຈໍາລາວ (WWF-Laos) ໄດ້ເປີດເຜີຍຂໍ້ມູນວ່າ: ປາຂ່າແມ່ນໍ້າຂອງຕາຍ 2 ໂຕ ພາຍໃນ 2 ເດືອນທີ່ຜ່ານມາ ໂດຍ, ໂຕທີໜຶ່ງຕາຍໃນວັນທີ 23 ເມສາ 2021 ແລະ ໂຕທີສອງໃນວັນທີ 14 ມິຖຸນາ 2021 ເຮັດໃຫ້ຈໍານວນປ່າຂ່າທີ່ຍັງມີເຫຼືອຢູ່ໃນປະເທດລາວແມ່ນສ່ຽງຕໍ່ການສູນພັນ

ແຫ່ງດຽວໃນ ສປປ ລາວ ທີ່ພວກເຮົາສາມາດພົບເຫັນປາຂ່າໄດ້ ກໍ່ຄືຢູ່ພາກໃຕ້ຂອງລາວ ເຂດສີພັນດອນ (ບ້ານຫາງສະດໍາ ແລະ ບ້ານຫາງຄອນ, ເມືອງໂຂງ ແຂວງຈໍາປາສັກ) ຊາຍແດນລະຫວ່າງ ລາວ-ກໍາປູເຈຍ.

ເຖິງແມ່ນວ່າ ໃນ 2 ປີທີ່ຜ່ານມາ ທາງພາກລັດ ກໍ່ຄືແຂວງຈໍາປາສັກ ໄດ້ຂະຫຍາຍພື້ນທີ່ອະນຸລັກ ໃຫ້ເປັນເຂດຫ້າມຫາປາ ຈາກ ເມື່ອກ່ອນ 20 ກວ່າເຮັດຕາ ເປັນເກືອບ 150 ເຮັກຕາ, ແຕ່ນັ້ນກໍ່ບໍ່ໄດ້ເປັນໂຕຊີ້ວັດ ຕໍ່ການຢູ່ລອດຂອງປາຂ່າ ເພາະສາເຫດຫຼັກຍັງຄົງແມ່ນມາຈາກຜົນກະທົບອື່ນໆ ເປັນຕົ້ນແມ່ນການຫາປາແບບຜິດກົດໝາຍ ການບູກລຸກ ຫຼື ກິດຈະກໍາຕ່າງໆ ທີ່ເປັນການລົບກວນ ລະບົບນິເວດທາງທໍາມະຊາດ..

ສາເຫດທີ່ເຮັດໃຫ້ປາຂ່າທັງ 2 ໂຕຕາຍນັ້ນ ຍັງບໍ່ສາມາດຍືນຍັນໄດ້ຊັດເຈນ.

ສຸດທ້າຍ,​ ອົງການ WWF-Laos ຮຽກຮ້ອງມາຍັງທຸກຄົນ ທຸກພາກສ່ວນຈົ່ງໃຫ້ຄວາມສໍາຄັນ ແລະ ຮ່ວມແຮງກັນຕໍ່ການປົກປັກຮັກສາ ແລະ ອະນຸລັກສັດນໍ້າ-ສັດປ່າ ທີ່ໃກ້ຈະສູນພັນ ໃຫ້ຢູ່ກັບແມ່ນໍ້າຂອງ ແມ່ນໍ້າສາຂາຕ່າງໆ ຢູ່ກັບຜືນປ່າ ແລະ ຊຸມຊົນກໍ່ຄືປະເທດລາວເຮົາ.

Related Posts

Leave a Reply

Your email address will not be published.