Breaking News

ແຊເປັນອຸທາຫອນເຕືອນສັງຄົມ ກຸ່ມຄົນບໍ່ດີມາຕົວະເອົາລູກສາວຂ້າມຊາຍແດນ

ເຈັບປວດທີ່ສຸດໃນເວລາຂຽນເລື່ອງນີ້. ຂໍໃຫ້ເອົາໃສ່ລູກຫຼານ ຍ້ອນໂຄວິດ ໂຮງຮຽນປິດ ຄວາມທຸກຍາກຂາດເຂີນໜີບຮັດ ພວກສວຍໂອກາດຄ້າມະນຸດເຄື່ອນໄຫວຫຼາຍ. ມັນເກີດຂຶ້ນແປະຮົ້ວ 3 ມື້ຜ່ານມາ. ຊິເລົ່າສູ່ຟັງ ແລ້ວເຕືອນກັນໄວ້.

6 ມແລງ ຜົວເມຍຄູ່ນັ້ນ ເຊັດນໍ້າຕາເລົ່າໃຫ້ຟັງວ່າ ລູກສາວ ພ້ອມໝູ່2ຄົນ ອາຍຸ 14-16 ຮຽນມໍສອງ ຖືກເຈົ້າຫນ້າທີ່ຫຼວງນໍ້າທາກັກຕົວ ກວດໂຄວິດຍ້ອນໄປຈາກວຽງຈັນ.ພໍ່ແມ່ຕົກໃຈຫລາຍ-ບໍ່ແມ່ນຍ້ອນເລື້ອງກັກກັນກວດພະຍາດ.

ສາມອາທິດກ່ອນມີຜູ້ແຊັດມາຫາວ່າ ສົນໃຈໃນການສົ່ງລູກສາວໄປເປັນເມຍຄົນຈີນຢູ່ຈີນພຸ້ນບໍ ຈະໄດ້ຄ່າດອງ 40.000.000 ກີບ. ຄອບຄົວກະພວມຝືດເຄືອງມີໜີ້ສິນ ລູກສາວກະພັກຮຽນ ຈຶ່ງລະດົມລູກສາວໄປ.

ຈາກນັ້ນໄດ້ໄປຊວນເອົາລູກສາວຂອງນ້ອງສາວອີກ. ນັດແລະພາກັນໄປສົ່ງເດັກທັງສອງຂຶ້ນລົດ ວັນທີ 12/6/21. ເດັກມີເຄື່ອງນຸ່ງ 2-3 ຊຸດ ແລະໂທລະສັບຜູ້ລະໜ່ວຍ ແມ່ເອົາເງີນໃຫ້ ຜູ່ທີໜຶ່ງ ໄດ້20.000 ກີບ ອີກຜູ້ໜຶ່ງ 50.000. ຍ້ອນບໍ່ມີແດ່ ແລະຜູ່ມາຮັບກະວ່າ ຈະຊື້ໃຫ້ໃໝ່ເລີຍ ບໍ່ຕ້ອງຫວ່ງ. ສ່ວນເງິນຄ່າດອງ ລູກສາວນັ້ນ ຮອດຈີນມື້ໃດລະຊິຝາກມາໃຫ້.

ລູກໄປແລ້ວ ຈຶ່ງມານອນຄຶດວ່າ ຜູ້ຊິເປັນເຂີຍກະບໍ່ເຫັນໜ້າ ຊິເອົາກັນເປັນຜົວເມຍແນວໃດ. ເງິນຄ່າດອງເພື່ອຊິມາປົດໜີ້ ກະຊິສົ່ງມາແນວໃດ ຖ້າບໍ່ສົ່ງມາຊິທວງຖາມນໍາໃຜ.ຖືກກັກແນວນີ້ ເຄື່ອງນຸ່ງ ເງິນຊິຊື້ກິນກະບໍ່ມີ ໂທຫາຜູ້ເຄີຍຕິດຕໍ່ກະຕັດສາຍໄປແລ້ວ.

ຈຶ່ງພາກັນມາປຶກສານໍາຂ້ອຍ. ຂ້ອຍກະໂທຫາຕໍາຫຼວດ ພວກເພີ່ນກະຢັ້ງຢືນວ່າ ຢູ່ໃນຄວາມຮັບຜິດຊອບຂອງເພີ່ນ ແລ້ວຕິດຕໍ່ຫາທາງອົງການບ້ານແລະ ຜູ້ເຮັດວຽກງານດັ່ງກ່າວ ຈຶ່ງໄປຮອດສະຫະພັນແມ່ຍິງນະຄອນຫຼວງ. ເພີ່ນດຳເນີນການທັນທີ. ແຕ່ 18:00 ແລງວານນີ້ ມື້ນີ້ 13,30 ເພີ່ນໂທມາຢືນຢັນວ່າ ພົບເຫັນວ່າເດັກປອດໄພດີ ແລະຢູ່ໃນຄວາມຄຸ້ມຄອງຂອງເຈົ້າໜ້າທີ່ ພວມດໍາເນີນການຕາມຂັ້ນຕອນ ແລ້ວຈະຈັດສົ່ງ ເດັກຄືນຫາຄອບຄົວແນ່ນອນ ພາຍຫຼັງກັກກັນ ສືບສວນ ເພື່ອດຳເນີນການຕໍ່ພວກກະທໍາຜິດ.

ພວກເພີ່ນເຮັດວຽກດ້ວຍຄວາມຮັບຜິດຊອບການເມືອງສູງ ມີຈັນຍາບັນ ແລະມີປະສິດທິຜົນ ໃນເງື່ອນໄຂຂອງປະເທດເຮົາຄືແນວນີ້ ໂດຍທີ່ຮູ້ແຕ່ຊື່ ສະຖານທີ່ແລະເຫດການ…ບໍທັນໄດ້ມີເອກະສານຂໍ້ມູນຫຍັງ. ຂ້ອຍຊາບຊຶ້ງໃນວິທີເຮັດວຽກແນວນີ້ທີ່ສຸດ

ຂ້ອຍເຄີຍຮ່ວມໃນຄະນະຜູ້ແທນລາວໄປເຮັດວຽກຢູ່ຈີນຫລາຍຄັ້ງ. ນັກການທູດລາວໄດ້ໃຫ້ຮູ້ແລະໃຫ້ພົບກັບນາງສາວທີ່ເປັນເຫຍື່ອການຖືກລໍ້ລວງໄປເອົາຜົວຈີນແບບບຊ່ຖືກຕ້ອງຕາມກົດຫມາຍແລະຮີດຄອງຄືແນວນີ້.ໂດຍລວມແລ້ວ, ເຂົາຢາກໄດ້ລູກ ເມື່ອເກີດລູກແລ້ວ ເຂົາກະຈະປະຖີ້ມ ຖືກບັງຄັບ ທໍລະມານ ຮ້າຍແຮງໄປກວ່ານັ້ນ ແມ່ນຖືກຂາຍຕໍ່. ຂ້ອຍໄດ້ຍິນຈາກປາກຂອງຜູ້ຮັບເຄາະມາດ້ວຍຕົນເອງ.

ເມື່ອຜົວເມຍຄູ່ນັ້ນໄດ້ຟັງແນວນີ້ ພວກເພີ່ນກິນບໍ່ໄດ້ນອນບໍ່ຫລັບ ຮູ້ສຶກກິນແຫນງທີ່ສຸດໃນຊີວິດ. ດີແຕ່ຮູ້ເລື່ອງພາຍຫລັງທີ່ເຈ້າຫນ້າທີ່ກັກໄວ້ແລ້ວ.

ຂ້ອຍຢາກກັບມາ ຂໍຊົມເຊີຍ ແລະຕາງຫນ້າຄອບຄົວຜູ້ຮັບເຄາະ ສະແດງຄວາມຮູ້ບຸນຄຸນຕໍ່ເຈ້າຫນ້າທີ່ຕໍາຫລວດ ຫລວງນໍ້າທາ ສະຫະພັນແມ່ຍິງນະຄອນຫລວງ, ຫລວງນໍ້າທາ ແລະສູນກາງ ອົງການປົກຄອງບ້ານ ແລະ ນ້ອງນ້ອງທັງຫລາຍ ທີ່ໄດ້ຍື່ນມືອັນແຂງແຮງມາຊ່ອຍດຶງເອົາເດັກສາວທັງສອງສາມຄົນອອກຈາກເງື້ອມມືມັດຈຸລາດ ໃນຂນະທີ່ພວມຢືນຢູ່ແຄມນາລົກແຫ່ງການຕາຍທັງເປັນ.

ບັນຫາຕາມມາແມ່ນຈະຊ່ອຍເດັກນີ້ແນວໃດເພື່ອໃຫ້ມີອານາຄົດ

About admin

Check Also

ສາວ​ໂສດ ຜູ້​ຂັບ​ລົດ​ໄຟ​ຄົນ​ທຳ​ອິດ​ຂອງ​ລາວ

ໂດຍ: ວັນ​ໄຊ ຕະ​ວິນ​ຍານ. ນາງ ສົມ​ພອນ ອິນ​ເລິງ​ສີ ເຕີບ​ໂຕ​ມາ​ຈາກ​ຄອບຄົວ​ຊາວນາ ຢູ່​ບ້ານສິລິ​ເຮື່ອງ ເມືອງ​ສິງ ແຂວງ​ຫຼວງ​ນໍ້າ​ທາ. ຈົບ​ການສຶກສາ​ຊັ້ນ​ມັດທະຍົມ​ສົມ ບູນ​ຢູ່​ໂຮງຮຽນ ມສ ບ້ານ​ກາງ​ໃໝ່ ເມືອງ​ສິງ …

Leave a Reply

Your email address will not be published. Required fields are marked *

Recent Comments

No comments to show.