Breaking News

ຊີວິດທີ່ຟືດເຄືອງຂຶ້ນຊ່ວງນີ້ ຈາກລັອກດາວຍາວກ້າວສູ່ຄ່າໄຟແພງຂື້ນ ງານບໍ່ເດີນ ເງີນບໍ່ໄດ້

Sponsor by sokxay plus


ວີທີຊື້ເລກ ໄດ້ຮັບເງີນຄືນ 5% ໄດ້ແທ້ 100%

ພຽງເທົ່ານີ້ ກໍ່ຮັບໄປເລີຍ ສ່ວນຫຼຸດ 5% ງ່າຍ




ການລັອກດາວ ຍ້ອນການລະບາດໃນຊຸມຊົນຂອງພະຍາດໂຄວິດ-19 ແກ່ຍາວກວ່າ 2 ເດືອນໄດ້ເຮັດໃຫ້ປະຊາຊົນຈຳນວນຫຼາຍ ມີຊີວິດທີ່ຟືດເຄືອງຂຶ້ນ ບວກໃສ່ບັນຫາຄ່າໄຟສູງກວ່າປົກກະຕິ ນັ້ນຍິ່ງສ້າງຄວາມລຳບາກໃຈບໍ່ໜ້ອຍຕໍ່ປະຊາຊົນໃນວົງກວ້າງ.

ການລະບາດຂອງພະຍາດໂຄວິດ-19 ຮອບສອງນີ້ນັບແຕ່ຫຼັງປີໃໝ່ລາວ ພສ. 2564 ມາຮອດວັນທີ 28 ມິຖຸນາ ນັ້ນບໍ່ມີທ່າທີ່ຈະຢຸດເຫຼືອສູນໄດ້ເທື່ອ ເຖິງວ່າຈຳນວນຂອງຜູ້ຕິດເຊື້ອໄດ້ຫຼຸດລົງ ໃນລະດັບທີ່ແນ່ນອນ ມາຮອດປັດຈຸບັນ ມີຜູ້ຕິດເຊື້ອສະສົມແລ້ວ 2101 ຄົນເຊິ່ງເປັນເຫດໃຫ້ຕ້ອງມີການໃຊ້ມາດຕະການ ໃນການຄວບຄຸມແລະປ້ອງກັນຂອງທາງການທີ່ເອີ້ນວ່າ “ລັອກດາວ” ແກ່ຍາວກວ່າ 2 ເດືອນ.

ແນ່ນອນການລັອກດາວໄດ້ສ້າງຜົນກະທົບຕໍ່ເສດຖະກິດ ແລະ ຊີວິດຂອງປະຊາຊົນທາງກົງ ໂດຍສະເພາະຜູ້ທີ່ຫາເຊົ້າກິນຄໍ່າ, ຜູ້ທີ່ຈັດໄດ້ວ່າ ແຮງງານນອກລະບົບ ທີ່ໝາຍເຖິງເມື່ອບໍ່ມີວຽກເຮັດ ກໍບໍ່ມີຫຍັງມາຄໍ້າປະກັນເລີຍ, ບໍ່ມີວຽກກໍບໍ່ມີລາຍໄດ້ມາຄໍ້າຈູນຄອບຄົວ.

ບັນຫານີ້ແມ່ນໜັກໜ່ວງ ຜູ້ທີ່ມາສ່ຽງໂຊກໃນເມືອງໃຫຍ່ອາໄສການອອກແຮງງານເປັນຕົ້ນຕໍນັ້ນ ຖ້າບໍ່ມີວຽກກໍໝາຍວ່າ ຄາດແຄນແມ່ນແຕ່ອາຫານການກິນເລີຍ ເຊິ່ງນັບແຕ່ການລັອກດາວມານີ້ ພວກເຮົາສາມາດເຫັນຫຼາຍໆກໍລະນີຜ່ານສື່ສັງຄົມ ທີ່ຜູ້ຄົນຮ້ອງຂໍຄວາມຊ່ວຍເຫຼືອໂດຍສະເພາະອາຫານການກິນປະທັງຊີວິດໄປແຕ່ລະມື້ ດັ່ງທີ່ກະຊວງແຮງງານ ແລະ ສະຫວັດດີການສັງຄົມລາຍງານຫວ່າງ ບໍ່ດົນຜ່ານມາມີແຮງງານຈຳນວນປະມານ 130.000 ຄົນຖືກໂຈະວຽກ.

ຜູ້ຂຽນມີເພື່ອນບ້ານຜູ້ທີ່ເປັນແມ່ລ້ຽງດ່ຽວລູກສອງ ລາວມີວຽກປະຈຳຄື ຊ່ວຍວຽກຢູ່ຮ້ານອາຫານ ແລະ ໂຮງແຮມ ແຕ່ຍ້ອນລັອກດາວລາວຈຶ່ງບໍ່ມີວຽກເຮັດ. ລາວມີຄວາມອຸກອັ່ງໃຈຫຼາຍ ວ່າຈະເອົາເງິນໃສມາເພື່ອຊື້ອາຫານທີ່ພຽງພໍໃຫ້ລູກທັງສອງ ແລະ ຕົນເອງກິນ ຍ້ອນບໍ່ມີວຽກເຮັດ ຕອນມີວຽກເຮັດກໍພໍແຕ່ເອົາຕົວລອດແຕ່ລະເດືອນ ຍ້ອນເງິນເດືອນໜ້ອຍຍິ່ງບໍ່ມີເງິນເດືອນເລີຍ ກໍຍິ່ງລຳບາກຂຶ້ນຫຼາຍເທົ່າ ເຊິ່ງຊີວິດລາວກໍເປັນໜຶ່ງໃນຈຳນວນຫຼາຍໆຄົນ ທີ່ໄດ້ຮັບຜົນກະທົບຈາກການລັອກດາວ.

ແຕ່ແນວໃດກໍຕາມ ມາຮອດປັດຈຸບັນ ໂດຍສະເພາະຄ່າໄຟຂອງເດືອນພຶດສະພາ ຫາ ເດືອນມິຖຸນາ 2021 ປະຊາຊົນຈົ່ມວ່າຄ່າໄຟເພີ່ມຂຶ້ນສອງສາມທົບທຽບໃສ່ປົກກະຕິທີ່ເຄີຍເສຍ, ຜູ້ທີ່ເຄີຍເສຍຈາກ 2 ແສນກີບຕໍ່ເດືອນກໍເປັນ 6-7 ແສນກີບເຊິ່ງເຮັດໃຫ້ປະຊາຊົນທີ່ມີຊີວິດຝືດເຄືອງຢູ່ແລ້ວນັ້ນ ກໍຍິ່ງຕື່ນຕົກໃຈ ເມື່ອເຫັນຄ່າໄຟບອກແຈ້ງຕາມບິນ, ບາງຄົນກໍສູງເກີນຄວາມເປັນຈິງຫຼາຍເທົ່າ.

ແນ່ນອນ, ເມື່ອໃຫ້ຜູ້ຄົນຢູ່ເຮືອນໃຜມັນເປັນເວລາຫຼາຍອາທິດຕິດຕໍ່ກັນ ນັ້ນການຊົມໃຊ້ນໍ້າປະປາ ແລະ ໄຟຟ້າຍິ່ງສູງຂຶ້ນກວ່າປົກກະຕິ ເພາະສະນັ້ນລັດຖະບານຈຶ່ງຖືວ່າ ການຜ່ອນຜັນການເກັບຄ່ານໍ້າ-ຄ່າໄຟໃນຊ່ວງລັອກດາວນີ້ຖືເປັນບູລິມະສິດໜຶ່ງ ທີ່ຈະຊ່ວຍເຫຼືອປະຊາຊົນໂດຍສະເພາະໄຟຟ້າ ໃຫ້ສັນຍາວ່າຈະຫຼຸດຄ່າໄຟລົງ 3%.

ເຖິງວ່າສິ່ງດັ່ງກ່າວໄດ້ເຮັດໃຫ້ປະຊາຊົນຈຳນວນຫຼາຍໄດ້ຮັບຜົນກະທົບຢ່າງໜັກແຕ່ກໍເຊື່ອໝັ້ນວ່າລັດຖະບານຈະຮີບຮ້ອນໃນການແກ້ໄຂຊ່ວຍປະຊາຊົນ. ນະໂຍບາຍໃດກໍດີ ທີ່ສາມາດຈັບຕ້ອງໄດ້ໃນເບື້ອງການແກ້ໄຂຊີວິດການເປັນຢູ່ຂອງປະຊາຊົນ ໂດຍສະເພາະກຸ່ມຄົນທີ່ມີຄວາມທຸກຍາກຂາດເຂີນ. ຄຽງຄູ່ກັນນັ້ນການມີນະໂຍບາຍທີ່ຜ່ອນຜັນຕໍ່ປະຊາຊົນ ໂດຍສະເພາະຄ່ານໍ້າຄ່າໄຟ ກໍຂໍໃຫ້ເຫັນປະຈັກຕາເຊິ່ງຈະສາມາດສ້າງຄວາມເຊື່ອຂອງປະຊາຊົນຍິ່ງຂຶ້ນ

ພ້ອມກັນນັ້ນພວກເຮົາກໍເຂົ້າໃຈດີວ່າ ເສດຖະກິດຂອງປະເທດກຳລັງຝືດເຄືອງ, ລາຍຮັບບໍ່ສາມາດບັນລຸເປົ້າ ແລະ ໜີ້ສິນເພີ່ມທະວີແຕ່ກໍເຊື່ອໝັ້ນຕໍ່ລັດຖະບານ ທີ່ຖືຄຳຂັວນວ່າ “ເວົ້າແທ້ທຳຈິງ” ນັ້ນຈະສາມາດນຳພາປະຊາຊົນ ແລະ ປະເທດຜ່ານພົ້ນວິກິດທີ່ສຳຄັນຂອງຊາດຄັ້ງນີ້ໄປໄດ້..

About admin

Check Also

ພະຍາກອນອາກາດ ປະຈໍາວັນທີ 18 ພຶດສະພາ 2022

ພະຍາກອນອາກາດ ປະຈໍາວັນທີ 18 ພຶດສະພາ 2022 ຄວາມກົດດັນຕໍ່າຂອງອາກາດຮ້ອນ ໄດ້ປົກຄຸມຢູ່ທົ່ວທຸກພາກຂອງ ປະເທດລາວ ດ້ວຍກໍາລັງອ່ອນ ສົມທົບກັບກະແສລົມຕາເວັນຕົກພັດ ປົກຄຸມເປັນສ່ວນໃຫຍ່ ຊຶ່ງຍັງຈະເຮັດໃຫ້ອາກາດເຢັນຢູ່ທົ່ວໄປໃນຕອນເຊົ້າ ແລະ ຍັງຈະມີຝົນຕົກ ຟ້າຮ້ອງ …

Leave a Reply

Your email address will not be published.

Recent Comments

No comments to show.